Cabdixakiin Dhooba-daareed “Hogaanka Puntland Saddex Reer ayaa isku Koobay

Cabdixakiin Maxamad Axmad Dhooba-daareed gudoomiyihii hore ee Barlamaanka Puntland ayaa si kulul uga hadlay xilka qaadistii lagu sameeyey, isaga oo eedeyn u jeediyey madaxda Puntland iyo mudanayaasha golaha shacabka.

Wareysi uu siiyey Tv-ga Universal ayuu ku sheegay in Puntland ay xiligaan gacanta u gashay kaligii taliye, sidoo kalena xildhibaanada barlamaanka Puntland ay maslaxadii ummadda ka doorteen lacag iyo laaluush sida uu hadalka u dhigay.

Isaga oo sii hadlayey ayaa sidoo kale waxaa uu sheegay in Puntland ay ku socoto wadadii bur-burka hadii wax laga qabana  arintaasi ay dadka uu matalo ka tashan doonaan aayahooda.

Mar uu ka hadlayay arimaha doorashooyinka ku saleysan Dimoqaraadiyada ee Puntland waxa uu sheegay in Saddex beelood kaliya ay isku koobeen hoggaaminta Puntland.

17-kii Bishii November ee sanadkaan ayaa xildhibaannada Golaha Wakiilada Puntland waxaa ay xilkii guddoomiyenimo ka qaadeen Cabdi Xakiin Dhoobo-daareed, iyaga oo ku eedeeyey in uu ku xadgudbay Dastuurka Puntland.