DF Somalia oo ka hadashay dagaalkii Muqdisho iyo in Weerar lagu qaaday Xasan Sheikh
|Qaybo kamid ah magaalada Muqdisho waxaa Galabta ka dhacay dagaalo u dhexeeya Ciidamada Dawladda iyo Maleeshiyaad Hubaysan, Waxaana Wasiirka amniga DF Soomaaliya Xasan Xundubey uu sheegay in Dowladda Soomaaliya ay soo afjartay Kooxo lasoo abaabulay oo maanta Muqdisho amni daro ka sameeyay .
Wasiirka Amniga ayaa sidoo kale Beeniyey in Weerar lagu qaaday Madaxwaynihii Hore ee Soomaaliya Xasan Sheikh Maxamuud.
“Madaxwaynihii hore Xasan Sheikh Maxamuud Tan iyo markii uu Xilka wareejiyey 2017, Waxaa Waardiye u ah Ciidamado ka tirsan Madaxtooyadda Soomaaliya, Ma jirto Cid weerar ku qaaday, waa in Runta loo soo noqdo.” Ayuu yidhi Wasiir Xundubey oo ugu baaqay Xasan sheikh inuu Tusaalle ka dhigto Madaxwaynihii hore ee Soomaaliya Aadan Cabdulle Cismaan ( Aadan Cadde).
Wasiirka Amniga ayaa sidoo kale ugu dambayntii Fariin u diray Shacabka Soomaaliyeed ee ku dhaqan magaalada Caasimada ah ee Muqdisho, Wuxuuna ugu baaqay inaysan Qayb ka noqon dagaalo meelo kale laga soo Xawilay.
“Dagaalka muqdisho loo soo rarayo waa dagaal ay wataan Dawlado shisheeye, oo Dad Soomaaliyeed ay dilaal ka yihiin”. Ayuu yidhi Xundubey.