Madaxweynaha dowladda Federaalka ah ee Soomaaliya Maxamed C/llaahi Farmaajo ayaa Guddi u magacaabay xiisadda ka taagan magaalada Beledweyne iyo shaqaaqadii uu ku geeriyooday Taliyihii Booliska Gobolka Hiiraan.
Guddigan ayaa baaritaan ku sameyn doona sababta ka dambeysay iska hor imaadka shalay ka dhacay duleedka Beledweyne, gaar ahaan deegaanka Kalabery.
Taliyaha Ciidanka Asluubta Sarreeye Guud Bashiir Maxamed Jaamac, Xeer Ilaalinta maxkamadda Ciidamada iyo xubno kale ayaa ka mid ah Guddigan, iyadoo Taliye Bashiir uu guddoomiye u yahay Guddigan.
Guddigan ayaa la filayaa inay kormeer ku tagaan magaalada Beledweyne, isla markaana baaritaan xaqiiq raadin ah ku sameynayaan dhacdadii uu ku geeriyooday Taliyaha Booliska Gobolka Hiiraan.
Xiisadda ka taagan magaalada Beledweyne ayaa salka ku heysa xil ka qaadistii lagu sameeyay Guddoomiyihii hore ee Gobolka Hiiraan Yuusuf Dabageed, waxaana ciidamo taabacsan ay dhaq dhaqaaqyo ka wadaan gudaha iyo duleedka magaalada Beledweyne.
Wararka ugu dambeeyay ee ka imanaya magaalada Beledweyne ee gobolka Hiiraan ayaa sheegaya in xaalada ammaanka magaalada ay degen tahay ayna la wareegeen ciidamada nabad ilaalinta AMISOM koontaroolka Kalabeyr iyo xarunta maamulka gobolka Hiiraan.Ciidamada Nabad ilaalinta AMISOM ee ka socda dalka Jabuuti ayaa la wareegay ammaanka xarunta maamulka gobolka Hiiraan halka ciidamada Nabad ilaalinta ee ka socda dalka Itoobiya ay la wareegeen koontaroolka Kalabeyr oo ah goobtii shalay lagu diley taliyaha ciidamada Booliska gobolka Hiiraan Maxamed Mocow.
Deegaanada ay la wareegeen ciidamadan nabad ilaalinta AMISOM ayaa waxaa ku sugnaa ciidamo daacad u ah Guddoomiyihi hore ee gobolka Hiiraan Yuusuf Dabageed.
Magaalada Beledweyne ee xarunta gobolka Hiiraan ayaa lagu wadaa inay gaaraan guddi uu magacaabay Madaxweyne Farmaajo
